Lota de is pastoris. Mps a sa Nuova: “Ancora una nova falsa”. Arregorta de dinai po Fresi

(IlMinuto) – Casteddu, 25 de su mes''e ledàminis - Roberto Fresi, su pastori fertu de unu lacrimogenu in sa càrriga de sa politzia de su merì de su 19 de su mes''e ledàminis in Casteddu, at pérdiu sa bista a un'ogu. Su Mps at cumetzau un'arregorta de dinai in favori de s'allevadori (causale "solidarietà per Roberto". Cordinadas bancarias IBAN: IT86N0101584970000070258118; codici Swift: SARDIT3SXXX; contu intestau a Natalino Sanna, Marta Pala e Gavino Mario Piras). In su trastempus sighit - nonostanti un'atóbiu informali tra su leader de su Movimentu Felice Floris e su presidenti de sa Regioni Ugo Cappellacci chi s'est tentu custu mangianu - s'ocupatzioni de parti Mps de s'àula de sa Cummissioni "Agricoltura" de su Consillu regionali. A pustus de sa fortuna de sa "noti bianca" de sàbudu (centinas de personis ant portau sa solidariedadi insoru a is pastoris asuta de is pórcius de su Consillu regionali), sa cida de su Movimentu de Felice Floris s'oberrit cun d'una smincida noa a una nova pubblicada de su giornali sardu de su grupu Espresso. "Su 'Movimento Pastori Sardi' – si ligit in d'unu post pubblicau a is 10.05 in sa pàgini uficiali de Facebook de Mps - smincit s'informatzioni falsa chi ddoi est in sa primu pàgini de "Nuova Sardegna" de custu manginu. Sa possibbilidadi de serrai sa negoziatzioni cun su pagamentu de is prémius únicus intru de su mes''e paschixèdda no esti stetia mai ogetu de allega".