“Firmamus sa Caserma!”, aMpI in pratza in Nùgoro contra a s’”iscola de gherra” de sa Brigata Sassari. Apellu a is “fortzas sentzeras”

(IlMinuto) – Casteddu, 27 de su mes''e ledàminis - Sighit sa batalla de aMpI contra a su fàbbricu de sa caserma de sa Brigata Sassari in Pratosardo. Po nai no a unu progetu cundividiu de centrudestra (su sotosegretàriu a sa 'Difesa' Giuseppe Cossiga e su deputau Bruno Murgia) e de su centrusinistra (su síndhigu de Nùgoro Sandro Bianchi), s'organizatzioni comunista e indipendentista at aprontau una manifestada in Nùgoro. S'apuntamentu est po sàbudu chi benit a is 17.00. Su corteu s'at a movi de s'arruga arburada Sardegna, a fac''e Artilleria.

"Po s'arrenéscia de sa manifestada - scririt aMpI in d'una nota de imprenta - lamaus a arregorta is fortzas sentzeras de sa natzioni sarda  e imbidaus a totus cussus chi funt acapiasus a custas chistionis a cabai in pratza portendi is caboris insoru, is próprias bandheras e su própriu contribbutu de anàlisi e de propostas". Políticus, militaris e giornalis - denunciat a Manca - faint passai custa frimmada noa de s'ocupatzioni militari de sa terra nostra comenti "ossígenu nou a un'economia de su territoriu oramai studada". "Sa cosa est ancora prus grai - precistat su comunicau - si pensaus chi su fàbbricu de sa caserma esti stetiu previdiu de s'acórdiu de programma in su 1997 impitendi su dinai regionali po s'edilitzia universitaria (casi 17 millionis de eurus). In d'una situatzioni chi bit is mellus universidadis sardas a arriscu de serrai (o de essi redusias a sa mannaria in modu grai) e chi bit medas maistus pagaus a un'euru a su mesi, is rapresentantis políticus 'fillus de mamma Itàlia' si frigant is manus pensendi de impitai su dinai chi furiat po s'universidadi po costruiri casermas".