Arrocau su Consillu regionali. Is pastoris blocant is intradas de su palatzu de bia Roma. Floris: “Fadeisì intrai. O no eis a bessiri”

(IlMinuto) – Casteddu, 19 de su mes''e ledàminis - "Si issus no bollint is pastoris aintru de su Consillu regionali insaras no ddus esus lassai bessiri. Ingiriaus su palatzu". Cun custus fueddus - naus de asuba de su palcu fattu in su momentu - su leader de Mps, Felice Floris, at donau su cumentzu a s'arrocamentu de su Consillu regionali de sa Sardigna, in Casteddu.

Abetendi de essi arricius de sa Cummissioni "Agricoltura" de su palatzu de bia Roma, is allevadoris (chi in pagu prus de 5 milla ant atravessau is bias de sa citadi in d'unu corteu paxiosu e carraxeri) ant difatis blocau dogn'intrada de s'assembrea de su pópulu sardu.

A s'arribbu insoru ant agatau unu palatzu giai presidiau de casi 100 politziotus e carabineris . Ma cali funt is dimandas de Mps? Su Movimentu guidau de Floris dimandat s'arrispetu de is impignus pigaus de sa Giunta regionali in s'atóbiu de sa metadi de su mes''e cabudanni, a cumentzai de sa de minimis. "S'Unioni europea - at afirmau Floris - previdit unu finantziamentu de 15milla eurus po is aziendhas de su cumpartu nostru e nos ddus bolleus totus. No si bastat su pagu dinai chi si bollint donai".

A sa manifestada ant pigau parti numerosus síndhigus (tra is àterus cussus de Aùstis, Ortzài, Guspini e Teulada) e unus cantu de militantis de Sni, aMpI e Irs. A is 13.15 de su mes''e ledàminis sighit s'arrocamentu. E sa tensioni est a is steddus.