Aciocu tra Prc e Pdci asuba de sa Giunta de Nùgoro. “Giovanna Ticca rapresentat a totu sa ‘Federazione della Sinistra’”

(IlMinuto) – Casteddu, 18 de su mes'e ledàminis - Aciocu opertu in sa 'Federazione della Sinistra' de sa Sardigna asuba de s'acuntéssia Nùgoro. A is declaratzionis púbblicas de su consilleri provintziali de su Pdci, Massimiliano Vacca ("in custu momentu no s'intendeus rapresentaus in Giunta"), chi dimandat in is fattus is dimissionis de s'assessori de Rifondazione Giovanna Ticca, arrespundint is capus mannus de su Prc sardu.

"Sa segreteria regionali de su Prc - si ligit in d'una nota de imprenta - no bit beni sa dimanda de dimissionis [...]. Custa dimanda no agatat nesciuna giustificatzionis, no ndi tenit política e nemmancu amministrativa. S'atzioni positiva portada ainnantis in custus pagus mesis de atividadi fatta in sa Giunta Provintziali e in d'unu contestu meda difícili iat a depi portai prus arrespetu". "Sa cumpàngia Giovanna Ticca - acrarat sa segerteria - dirigenti de su partidu nostru, est in sa Giunta Provintziali po rapresentai totu sa 'Federazione della Sinistra', s'atzioni de su consilleri Massimiliano Vacca, no esti stetia discutia in nesciuna reunioni de sa Federatzioni e comentisiollat agatat s'arrialia frimma de su Prc de sa Sardigna".

A pagus cidas de su cungressu natzionali no andat totu beni in sa 'Federazione della Sinistra'.

"Est intentzioni nostra - precisat su Prc - de sighiri cun cunvintzioni in sa costrutzioni de sa Federatzioni e pensaus chi depant fai sa mantessi cosa totus cussus chi ant addiriu a su progetu".