Vol2.0. Comdata: "Centru nou in 45 diris". Ma po 123 traballantis su dramma sighit

(IlMinuto) – Casteddu, 23 de su mes''e cabudanni - "Credeus de podi allestiri su centru nou in d'unu mesi e mesu, in su territoriu de Sestu e de podi portai órdinis nous, forsis puru clientis nous. Ma po su momentu no podeus pigai de prus de 350 unudadis". Est cantu ant afirmau martis passau is dirigentis de Comdata a sa fin''e de unus cantu atóbius cun is rapresentantis de is organizatzionis sindacalis e de sa Giunta regionali. S'aziendha piemontesa at a pigai su controllu de s'ex Video online 2.0, ma po unu númeru 473 operadoris 123 traballantis de su call center casteddaiu ant a abarrai senz''e traballu.

"Su pianu - cummentat su presidenti de sa Regioni Ugo Cappellacci - previdit de pigai 350 unidadis e si siat a depi ammanniai s'atividadi de donai traballu primu a is traballantis chi abarrant senza. Sa Regioni at fattu s'ipótesi de fai interventus chi agiudint fintzas a 600 traballantis. Nesciunu at essi lassau a sa própriu preneta, s' at a fai su possíbbilis po agiudai totus cussus chi non ant a podi essi pigaus fintzas de sa primu diri de atividadi".

In su mentris in su grupu Facebook "Aiutiamo Vol2" tzacarrat sa trivérsia.

"Gratzias a sa Regioni chi arregalat dinai a Comdata", si podit ligi in d'unu post. "Dinai pagau de nos cun is pagamentas nostras senz''e ponni ponteddus ma fadendi fai su conchistadori in terra sarda senz''e fai sa prus pitica resisténtzia!".