Vol 2.0 – Comdata. Sinistra critica: 'Nudda de afestai: escludius in 123. Operatoris de call center no tenint bisongiu de meris'

(IlMinuto) – Casteddu, 27 de su mes''e cabudanni - "No dd'at nudda de afesta". Cumentzat aici sa nota fatta connosci de su cumpartu informatzioni de Sinistra critica sarda asuba de s'acuntéssia "Video online 2.0-Comdata". "S'acórdiu tra Regioni, s'aziendha e is organitzazionis sindacalis - sighit su scritu - lassat difatis a foras de produtzioni 123 traballantis e ndi pigat 350 ponedi su call center in is manus de un'aziendha piemontesa (chi su Piemonti 'e totu iat no meda tempus fait lissentziau unu grupu de giòvanus precarius). S'aziendha est interessada scéti a sa possibbilidadis de podi suspiri de is cassas de sa Regioni Sardigna 3.500 euru po traballanti". S'organitzazioni de sa sinistra anticapitalista no si limitat a sa crítiga.

"Epuru - concluit Sinistra Critica - in prus de duus mesis de autogestioni is 473traballantis de su call center casteddaiu de bia Montecassino iant sighiu a traballai cun su màssimu de sa professionalidadi a s'órdini Telecom. Sa Regioni Sardigna iat depiu duncas individuai is istrumentus po ponni in deretura su controllu de is operadoris s'atividadi, salvendi su traballu de totus e senz''e arregalai nudda a un'àteru 'imprendidori-pigadori'. Is traballantis de Video online 2.0 no teniat bisóngiu de meris, de personis chi guadangiant asuba de is pabas senz''e fai nudda".