UN'ANNU FAIT. Iscola: sighit s’ocupazioni de s’ Ufíciu provinziali de Su Masu, "Lotaus po un’iscola de calidadi"

(IlMinuto) – Casteddu, 18 de su mes”e cabudanni – “Alfabetizzai sa stampa”. Cun custu obbiettivu in su mericeddu de ariseru esti stetiu convocau un’atóbiu in sa sedi de s’Ufíciu “Scolastico provinciale” de Su Masu, ocupau de duas cidas. “Sighint a no passai medas concettus chi po nosu funt fundamentalis”, at spiegau sa maista precaria Laura Stochino. “S’accordu – at nau – est indirizzau scéti a cussus chi s’annu passau ant traballau cun d’una supplenza annuali e chi giai arriccint un’indennidadi de disoccupazioni”.Is cuntrattus de disponibilidadi – esti stetiu spiegau – coinvolgint scéti una parti piticca de is maistus (no est claru in custu momentu si su personali Ata ndi siat coivoltu) e cun modalidadis meda sìmilis a su traballu a zerriada. “De su cuntrattu de disponibilidadi – si podit liggiri in d’una nota fatta conòsciri de su “Comitato insegnanti Precari” – iant depit essi esclusus, no scéti chi at traballau po totu s’annu cun incumbènzia de is presidis, ma puru totus cussus chi ant maturau un’annu de serbiziu accumulendi prus periudus in iscolas diversas o po medas imparamentus”. De s’Usp no est arribbau nesciunu scontu a s’accordu Baire-Gelmini nonostanti is ipòtesi – no definias – de rimodulazioni de s’intesa fatta de su presidenti de sa Regioni. “Poita 20 millionis de eurus benint usaus po is ammortizzadoris sozialis e no benint usaus in modu prus produttivu po s’instruzioni? No est chi si bollit destrutturai e dequalificai s’iscola po arribbai a ateras cosas?”, at dimandau retoricamenti Stochino. In s’atóbiu cun sa stampa, organizzau de su “Coordinamento precari scuola Cagliari”, ant partecipau puru is rappresentantis de is Cobas iscola e de sa Cgil, chi, comenti at spiegau Paolo Castangia de sa Flc-Cgil “ant dirigiu sa lota unius”. “Eus refudau s’atóbiu cun s’asserosri Baire – at nau Castangia – própriu poita at postu condizionis po sa delegazioni nostra, escludendi calincunu de nosu”. “Lotaus po unu traballu e po un’iscola de calidadi – at colncludiu Rossella Vacca de is Cobas – e resistiri aintru de su Provveditorau at essi utili”. Custumerì is ocupantis ant aghilliri su poeta Nino Nonnis e su cantautori Piero Marras.