Sport: is féminas de sa 'Tennistavolo' Norghìddo prontas po sa A1

(IlMinuto) – Casteddu, 1 de su mes''e cabudanni - Su sónniu diventat realidadi. Sa scuadra de is féminas de 'Tennistavolo' Norghìddo est difatis pronta a s'esordiu in série A1. Sa nova de su recúperu in sa màssima série est arribbada in su coru 'e s'istadi e po su team de su presidenti Simone Carrucciu no ddo esti stetiu nemmancu su tempus de s'alligrai.

"Sa dirigéntzia - si ligit in d'una nota de imprenta - s'est ghetada debressi in su mercau po agatai is atletas prus bravas, chi ddi permitant de arribbai a sa salvatzioni senz''e medas pensamentus. Sa scuadra est pronta ma at essi fatta connosci in is cidas chi benint". De sa stagioni sportiva chi benit is amantis de su 'tennistavolo' no s'ant a depi prus movi in sa lacanàrgia Sorradile po sighiri sa scudra insoru. In Norghìddo ddoi at essi difatis sa palestra noa de bia Azuni.