Serbítzius. 1500 firmas contra a sa sciusciadura de sa Citadella finantziaria de Casteddu. Interrogatzioni in parlamentu e in Provìntzia

(IlMinuto) – Casteddu, 24 de mes''e cabudanni - Crescit s'opositzioni a sa sciusciadura de sa Citadella Finantziaria de Casteddu, cun su trasferimentu de s'Agenzia de su Territoriu in viale Jenner. In pagu diris funt difatis giai 1.500 is firmas arregortas in acotzu de sa petitzioni popolari mandada a su Ministeru de is "Finanze". Sa cosa est promòvia de s'Usb, Salfi, Cgil,Cisl e Uil. "Cun sa sciusciadura de sa 'Citadella Finantziaria' - si ligit in sa petitzioni - s'amministratzioni iat a fai unu passu agoa de medas annus si castiaus a is obbietivus otentus cun sa centralizatzioni de totus is ufícius finantziarius in d'un'única istrutura facili de ragiungi de calisiollat parti de sa citadi e de is biddas lacanargias".

Su trasferimentu - acrarat su documentu - iat a fai unu dannu "a is abitantis de sa provìntzia de Casteddu, de sa provìntzia de Crabònia- Igrèsias e de su Campidanu de Mesu, chi a custu centru faint riferimentu po medas pràtigas fiscalis".

Sa chistioni est giai arribbada in Parlamentu e in su Consillu provintziali de Casteddu. Sa deputada de su Pd, Amalia Schirru, at difatis presentau un'interrogatzioni parlamentari po fai craresa asuba de s'acuntéssia.

In Provìntzia sa chistioni "Cittadella Finanziaria" est intradacun d'un'interrogatzioni a su presidenti Graziano Milia presentada de Massimo Pusceddu (Pd) e firmada de totu su Consillu.