Scriri 'Savoia zenia de porcos' no est cosa de cundennai. Su Tribbunali de Casteddu declarat innocenti a Cumpostu. Su leader indipendentista: 'Ingestu políticu'

(IlMinuto) – Casteddu, 30 de su mes''e cabudanni - "Su giugi at scipiu lígiri cu atentzioni is fattus cumprendendi ca s'atzioni nostra furiat strintamenti política". Cun custus fueddus su leader de Sardigna Natzione Indipendentzia, Bustianu Cumpostu, at cummentau sa senténtzia de su Tribbunali ordinàriu de Casteddu chi custu mangianu dd'at assólviu "po s'ispeciali lebiesa de su fattu". Cumpostu iat difatis presentau recursu contra a su decretu penali chi dd'iat cundennau a 10 diris de presoni o a su pagamentu de 400 eurus po ai scritu, in su 2006, "Savoia zenia de porcos" in su basamentu de sa statuade Carlo Felice in pratza Jenne, in Casteddu. Un'atzioni política in arrespusta a is frasis aggraviadoras pronuntziadas s'annu primu de Vittorio Emanuele de Savoia in is cunfrontus de is sardus ("funt cabras", "pudescint e basta").

Cun s'agiudu de unu trasladori, Bustianu Cumpostu – difendiu de s'abogau Pier Gavino Paolini – at presentau is próprius arrexonis in sardu."In cussu momentu - at acrarau Cumpostu a su giugi po s'udiéntzia preliminari Altieri - eus interpretau su disdeni de totu su pópulu sardu contra a is fueddus de Vittorio Emanuele de Savoia". "Cumpostu – at precisau s'abogau Paolini - no est su tipu chi andat a ammammungiai is murus. Sa frasi furiat stetia scrita cun d'unu vernissu chi si podiat burrai, cun s'intentzioni de ndi dda liai a pustis de 10 diris".In dógnia modu, su leader indipendentista no iat essi mai acetau de pagai sa multa. "No potzu pagai a su stadu italianu - at nau - una smenda po un'impriastru fattu asuba de cussu chi, in d'unu modu o in d'un'àteru, est unu beni monumentali de sa Sardigna. Sa multa mi depit essi assignada de su stadu sardu".Su cordinadori de Sni lassat su Tribbunali de pratza Repubblica cun duus fueddus dedicaus a is "reis". "Is Savoia innoi prus chi fragu de crabu ant lassau fragu de sàngui", at afirmau Cumpostu ammentendi "is concas de is patriotas apicadas in s'intrada de Tàtari".