Presonis. Caligaris (Sdr): "In Buoncammino presoneri incompatìbili cun sa presonia"

(IlMinuto) – Casteddu, 20 de su mes''e cabudanni - "No funt ancora finias is malaventuras po Roberto Vinci, 38 annus, de Jaròi. Est incompatìbili a sa presonia, ma sighit a patiri su presoni oramai de dexi mesis". Est cantu denunciat cun d'una nota Maria Grazia Caligaris, presidenti de s'Assótziu Socialismo Diritti e Riforme.

"S'ómini - precisat sa rapresentanti socialista - malàdiu de un'abbatimentu grai e senz''e torrada, cun sa fissatzioni de si bociri, est torra in d'una cella de su Centru Diagnosticu Terapeuticu de Buoncammino aundi benit acastiau fissu atressu de una telecamera. Is cunditzionis suas si funt aggravadas po mori de sa permanéntzia de prus de 90 diris in s'Istitutu de Pena de Torinu".

Vinci, presoneri invàlidu a s'80 po centu própriu po sa psicopatologia chi tenit, est, segundu is peritus de su Tribbunali, incompatìbili cun sa presonia e puru cun su ricòveru a s'Ispidali Psichiàtricu Giuditziàriu. Cundennau a 20 annus de presonia, s'ómini at fintzas a immoi scontau 13 annus e mesu de presoni.