Carceri. Loddo (5 novembre): “Buoncammino un inferno per i familiari dei detenuti”. Ogni settimana protesta di fronte al penitenziario

(IlMinuto) – Casteddu, 3 de su mes''e cabudanni - "Su presoni de Buoncammino rapresentat unu beru e própriu inferru po is familiaris de is presoneris". Est cantu at denunciau ariseru su rapresentanti de s'Assótziu 5 novembre, Roberto Loddo, in d'una cuferéntzia de imprenta chi s'est tenta in su Palatzu Regiu, in Casteddu. "No bastat scéti sa boluntadi de is diretoris e de is operadoris - at acrarau Loddo - su sistema de is collóchius tra is personas cundennadas e is famílias insoru est unu calvàriu rapresentau de sa totali ausenzia de assistu: oras e oras asuta de s'àcua e asutta de su soli, primu de intrai in d'una sabixedda de intrada stibbida, bruta e aundi ddoi est carraxu meda". "S'immàgini meda mala de is familiaris stibbius e ammassaus unu asuba de s'àteru prima de arribbai a sa saba de is collóchius - at sighiu su rapresentanti de "5 novembre" – est indinna de unu logu chi si definit civili". A su discumbéniu de is presoneris de Buoncammino (a su 29 de su mes''e làmpadas 2010 524 ànimas stibbius in d'un'istrutura chi ndi podit aghilliri a su màssimu 467) s'aciungit duncas sa sufaréntzia de is familiaris."Vìtimas innocentis - at concludiu Loddo - de unu sistema cartzeràriu chi s'agatat in totu e po totu in cunditzionis illegalis e po nudda costitutzionalis. Sa Costitutzioni, in s'artículu 27, stabbillit difatis ca is penas no podint essi contràrias a su sensu de umanidadi e si depint movi po torrai a educai su cundennau".

Is vìtimas chi perou cumentzant a s'aprontai. In sa cuferéntzia de imprenta is familiaris de is presoneris ant difatis cuncodrau un'apuntamentu a sa cida (dógnia lúnis a is 15.00) a fac''e de su Presoni de Buoncammino. "S'obbietivu - at precisau Loddo - est allargai su frunti de su disacórdiu de is familiaris e costruiri formas noas de lota e de dinúntzia po is violatzionis de is diritus civilis e umanus".