Video on line 2.0. Acórdiu Regioni-Comdata po su pianu industriali chi previdit de pigai 350 traballantis

(IlMinuto) – Casteddu, 9 de su mes''e austu - Sa chistioni Video on line 2.0 fait unu passu ainnantis. Sàbudu passau sa Regioni Sardigna e sa Comdata, aziendha chi operat in su cumpartu de is telecomunicazionis, ant firmau una lítera de impignus chi previdit de pigai assumancu 350 operadoris de su call center casteddaiu de bia Montecassino.
Su documentu - si ligit in d'una nota pubblicada in su giassu uficiali de sa Regioni Sardigna - "impegnat Comdata a s'organizazioni de unu pianu industriali adatu cun sedi in Casteddu o in is biddas chi funt acanta de sa citadi; a sa costituzioni de una sociedadi noa (newco), cun sedi legali e in atividadi in Sardigna, e a pigai a tempus indeterminau assumancu 350 ex traballantis impiegaus in sa Vol 2 Srl, a un'acrescimentu de is postus de traballu atressu de s'acabidamentu chi depit essi fattu asuba de àterus cuntratus possíbbilis po is ex traballantis de sa Vol 2 Srl chi ant a abarrai senz''e traballu e chi si s'ant a agai in d'unu stadu de disimpreu candu s'aziendha at a depi pigai àterus traballantis".
Sa Regioni s'impignat, "in s'arrespetu de is normativas in cursu in custu momentu", a agiudai economicamenti s'investimentu de Comdata. In sa mantessi diri Comdata e Telecom ant firmau un'acórdiu po s'assignamentu de is órdinis.