Presonis. In Buoncammino sbentau un'ateru tentativu de suicìdiu. Caligaris (Sdr): "Tocat afortiai is mesuras de prevenimentu"

(IlMinuto) – Casteddu, 27 de su mes''e austu - Funt necessàrias mesuras de prevenimentu noas po afrontai s'apretu de is suicìdius in is presonis. Est cantu narat cun d'una nota Maria Grazia Caligaris, presidenti de s'assótziu Socialismo Diritti e Riforme, a pustis de ai scipiu de s'úrtimu tentativu, fattu de una presonera nigeriana, de si ndi liai sa vida  in su presoni de Buoncammino, in Casteddu. "Un'ingestu disisperau - commentat Caligaris - chi est sa síntesi meda mala de sa cunditzioni de opressioni de s'esperiéntzia in is presonis. Unu tzérriu mudu de dolu chi iat a essi potziu essi senz''e torrada chi no fessat stetiu po sa professionalidadi de is Agentis in serbítziu".

Sa fémina, de 25 annus, esti stetia cundennada in primu gradu a ses annus de presoni. S'ómini, chi furiat cun issa in su momentu de s'arrestu, iat bufau óvulus chi teniant aintru casi unu chilu de eroina. Unu fatu, custu, chi sa picioca narat de no connnosci. A pustis de 11 mesis de presonia, pigada de su scoramentu, sa fémina at ingurtiu una sustàntzia usada po puliri is cellas. S'agiudu lestru de is agentis e de sa compàngia at limitau is dannus. "Sa giovunedda, chi si declarat innocenti, esti stetia pigada de una crisi de scoramentu, endu scipiu - precisat Caligaris - de su stadu meda malu de saludi de sa fillixedda chi bivit cun sa tzia in Nigeria".

"No scéti s'agiudu de is operadoris - concluit sa Caligaris -,  est craru difatis ca unu presoni po podit fai una traballu de prevenimentu fattu beni depit podi contai asuba de unu númeru giustu de figuras professionalis de dógnia livellu". Aici no est in Buoncammino e in medas àterus presonis italianus.