Presonis. Assótziu "5 novembre": "Libberai a Prosper"

(IlMinuto) - Casteddu, 30 de su mes''e austu - "Prosper no depit abarrai in presoni". Est cantu narat cun d'unu comunicau de imprenta Marinella Canu de s'Assótziu "5 novembre Per i diritti civili", a pustis ca sa fémina at tentau de si bociri. Canu pedit de fai bessiri de su presoni sa fémina nigeriana presonera in Boncammino, in Casteddu."Comenti denunciau prus bortas de s' Assótziu - si ligit in d'una nota - is cunditzionis de conca de sa fémina funt grais. Cunditzionis in scontróriu cun sa visa in presoni. Prusatotu in custas oras s'est scìpiu, de cantu at nau su fradi de sa fémina, de sa morti de sa filla de 7 annus. S'assótziu "5 novembre" cunsiderat apretosu e necessàriu chi sa fémina ndi siat bogada de presoni".
Cust'acuntéssia - finit Canu - est sa fotogràfia de su mali in presoni. Unu mali chi iat a depi fai fai cunsidérius, a sa sociedadi civili e a totu su mundu políticu, asuba de sa mancàntzia de profétus de su presoni".