Video on line 2.0. Sartànias e pingiadas po isfidai a Telecom. In Regioni si chistionat de ammortizadoris socialis

(IlMinuto) – Casteddu - 28 de su mes''e argiòlas - Sartànias e pingiadas de atobbai cun turras de linna. Funt custas is "armas" usadas de is 480 traballantis de Video on line 2.0 po isfidai a sa Telecom, a pustis de ai sciusciau su cuntratu cun su call center casteddaiu.
Custu mangianu, in Casteddu, is operadoris telefonicus ant isfilau de sa sedi de s'assessorau regionali de su "Lavoro", in bia XXVIII febbraio (aundi furiat in programma un'atóbiu tra is sindacaus e s'assessori Carlo Manca), finzas a su Palazu Telecom in praza Giovanni XXIII, blochendi su tràvigu po unus cantu oras.
Tema de s'atóbiu tra su rapresentanti de sa Giunta e is rapresentantis sindacalis esti stetiu s'impitu de is ammortizadoris socialis (o de una calisisiat forma de agiudu) po salvai su rédditu de is casi 500 traballantis e de is famílias insoru.
"In custa fasi delicada - si ligit in d'una nota fatta connosci de sa Cgil - penzaus chi siat necessàriu ativai totus is formas chi podint fai pressioni asuba de sa Regioni e de sa Telecom, po apretai is tempus po arribbai a sa soluzioni de sa vertenza cun su fini de spingi sa Telecom e sa Regioni a no si ndi scaresci de is fueddus naus in is cidas passadas".