Trasportus de is mercis: "No a s'archiviazioni de s'inchiesta. Trenitalia no at arraspetau is impignus pigaus cun sa Regioni Sardigna"

(IlMinuto) – Casteddu, 13 de su mes''e argiòlas - "Trenitalia no at arraspetau nesciunu de is impignus pigaus cun sa Regioni Sardigna po garentiri su tràvigu mercis po mesu de is telladas tra s'Ísula e sa Penísula e a s'opostu". Est cantu afirmat cun d'una nota Maria Grazia Caligaris, presidenti de s'Assóziu Socialismo Diritti e Riforme, po sa reunioni (in programma a is 11.00 in Casteddu) de sa Càmera de Consillu chi at a depi decídiri asuba de sa dimanda de archiviazioni fatta de is Sustituius procuradoris Mario Marchetti e Marco Cocco po s'inchiesta de sa firmada de prúbbicu serbíziu mercis po mesu de is telladas de parti de is Ferruvias de s'Istadu.
Caligaris narat no a s'archiazioni. "Pensaus - precisat sa presidenti de Sdr - ca siant nezessàrius àterus spricullitus. Ddu imponit sa realidadi de is fattus.
Sa línia Civitavecchia-Figari esti stetia scancellada; una parti de is traballantis de is Ferruvias de s'Istadu funti stetius trasferius in sa Penísula e àterus funt ancora in serbíziu in Sardigna ma no funt traballendi; is operadoris privaus de is portus aundi lompint is mercis, immoi abbandonaus a su sderruimentu, ant perdiu su traballu, sa motonavi Garibaldi no ddoi est prus e at essi isciasciada; sa soluzioni provisória de Trenitalia po su tretu Livornu-Terranòa s'est svelada una faba'".