Traballu. Sa Corti costituzionali blocat sa stabilizazioni de is precarius de Provìnzias e Comunus

(IlMinuto) – Casteddu, 8 de su mes''e argiòlas - Novas malas po is precarius de is Provìnzias e de is Comunus. Sa Corti costituzionali at difatis bullau sa stabilizazioni in is entis de su territoriu previdia de sa lei regionali 3 de su 2009 - aprovada puru cun is votus de s'oposizioni - acetendi su recursu fattu de su Guvernu Berlusconi.
Sa norma esti stetia bullada scéti in is comas dedicaus a su traballu a tempus indeterminau de is precarius, chi no iant a arrespetai cantu nau de su terzu coma de s'artículu 97 de sa Costituzioni: "A is impignus in is púbblicas amministrazionis s'intrat atressu cuncursu, sarbu candu ddu narat sa lei".
"Pigau atu de sa senténzia aundi sa Corti costituzionali s'imbidat a circai una forma de sceberu adata a avreguai sa professionalidadi de is traballantis de stabilizai - at cummentau su consilleri regionali de Sinistra Ecologia e Libertà Luciano Uras - o a inditai cun craresa is abbisóngius importantis chi bint comenti cosa necessària cussa de pigai a tempus indeterminau custus traballantis, depeus fai debressi is cambiamentus a is dispostas cundierradas in modu chi no pozant essi  prus atacadas".