Nucleari: possíbbili riniviu a su mes''e maju de su 2011 po su referendum

(IlMinuto) - Casteddu, 16 de su mes''e argiòlas - Iat a podi essi spostau a su beranu chi benit su referendum po su nucleari in Sardigna. Dd'at fattu sciri ariseru su Cumitau Aprontadori a sa fin''e s'atóbiu cun s'ufíciu de sa Presidénzia de sa Regioni fissau po cumbènniri sa data de su votu.
Giandomenico Sabiu, de s'Ufíciu de sa Presidénzia, at propostu a su Cumitau aprontadori - guidau de Bustianu Cumpostu - de spostai sa data de su Referendum de s'atóngiu de su 2010, períodu propostu de su Cumitau, a su beranu chi benit.
 "Sabiu - si ligit in d'una nota fatta connosci de su cordinadori Bustianu Cumpostu - at informau su Cumitau de is costus de sa lamada a su referendum, e de is arragus ténnicus chi iat a fai s'obertura de is urnas po sa data inditada de su Cumitau Aprontadori. At duncas dimandau de pigai in cunsidériu s'ipótesi de uniri su referendum a is elezionis amministrativas comunalis de su mes''e arbili-maju de su 2011, chi interessant unu cuartu de s'eletorau sadru".
"Su Cumitau Aprontadori - at acrarau Cumpostu - at pigau atu de sa proposta e si pigat dexi diris po donai un'arraspusta, est a nai a pustis de sa reunioni de su 'Comitato Sì No Nucle'".