Nucleari. Cumpostu (Sni) arraspundit a aMpI: "Sa soverania est in su coru de sa campagna referendaria nostra"

(IlMinuto) – Casteddu, 13 de su mes''e argiòlas - Est polémica oberta tra Sardigna Natzione e a Manca pro S'Indipendentzia a pustis de sa decisioni de s'organizazioni comunista e indipendentista de no addiliri a su "Comitato per il SI contro il nucleare" abetendi su referendum de s'atóngiu chi benit. A su comunicau fattu connosci de aMpI ("Unu Cumitau contra a su nucleari - at acrarau su diretivu de a Manca - no podit no tenni comenti coru de sa chistioni sa soverania"), arraspundit oi su cordinadori nazionali de Sni, Bustianu Cumpostu.
"Sni - declarat Cumpostu - su referendum dd'at promòviu prusatotu po donai a su pópulu sadru sa possibbilidadi de fai un'azioni de soverania. Asuba de sa soverania eus a impostai sa campagna referendaria de Sni e no eus a permiti ca nesciunu pongat su própriu capeddu esclusivu asuba de custu tema".
Is duas forzas indipendentistas espressant perou una bisioni diversa asuba de is modus de fai su Cumitau.
"Eus promòviu su cumitau po s'"éja", chi est un'àteru livellu, poita penzaus ca sa soverania siat unu caminu chi si pozat fai impari - acrarat su cordinadori de Sardigna Natzione Indipendentzia - puru cun sadrus chi no funt ancora indipendentistas, sadrus chi funt asogaus prus de nos de sa colonizazioni e custu no dd'ant a cumprendi mai si sigheus a ddus isolai e a ddus cunsiderai nemigus".
Acanta de sa campagna referendaria aintru de su Cumitau, Sni at aprontau puru una fibera de apuntamentus "de partidu" in su territoriu. Sàbudu chi benit s'at a tenni un'atóbiu, cun sa participazioni de Cumpostu 'e totu e de àterus rapresentantis de Sni, in Bosa (18.00, "Saba Billia Muroni").