Acuntéssia Bellomonte. Sa solidariedadi de su Prc: Cpn aprovat s'odg in solidariedadi a su dirigenti de a Manca

(IlMinuto) - Casteddu 20 de su mes''e argiòlas - Crescit sa mobilitazioni in faori de Bruno Bellomonte. Domínigu passau, in Roma, su Cumitau políticu nazionali de "Rifondazione comunista" at difatis aprovau a s'unanimidadi un'odg in solidariedadi a su dirigenti de aMpI.
"Bruno Bellomonte, dirigenti sindacali comunista e indipendentista - ammentat su 'parlamenteddu' de Rifondazione comunista - est in presoni de prus de un'annu in Catanzaru cun s'acusa de ai pensau de aprontai un'atentau candu su movimentu sadru si furiat preparendi a apariciai is atuamentus de lota in ocasioni de su G8 chi s'ant essi depius tenni in Sardigna in su 2009".
"Su Cumitau políticu nazionali denunciat - apabas de una proposta de Gianni Fresu (segretàriu regionali Prc), Vincenzo Pillai, Nicola Culeddu, Laura Stochino e Giovanna Ticca - s'atu meda grai fattu de is Ferruvias (Rfi) chi ant lissenziau a Bellomonte primu de su processu, e denuciat puru s'abbusu de su sistema de is presonis italianas chi at sèmpiri arrafudau is dimandas de sa família de otèniri su trasferimentu in d'unu presoni sadru o assumancu prus acanta a sa Sardigna".
"Cust'acuntéssia - precisat su documentu - est scéti una de is medas esémpius de un'avelenamentu de azionis malas fattas dógnia diri, azionis chi pesant asuba de migliaja de militantis chi in totu s'Itàlia lotant po difèndiri is diritus concuistaus in prus de cent'annus de lotas de su movimentu operàju e democràticu".