Video on line 2.0: sighit s'ocupazioni de su call center. S'assessori Manca: "Telecom narat ca no liat de sa Sardigna is órdinis"

(IlMinuto) - Casteddu, 29 de su mes''e làmpadas - "Telecom narat ca no nd'at a liai de sa Sardigna is órdinis de Video on line 2.0". Dd'at afirmau ariseru s'assessori regionali de su "Lavoro", Franco Manca, in d'un'atóbiu - in sa sedi de sa Regioni de viale Trento - cun is rapresentantis sindacalis de su call center casteddaiu.
"Telecom - at nau s'assessori de sa Giunta regionali resuminendi is arrisurtaus de sa reunioni romana cun is capus mannus de s'aziendha - at apreziau meda sa gana de is traballantis de sighiri s'atividadi nonostanti no ddoi siant is cundizionis po ddi si donai su stipendiu. Sa chistioni immoi est cussa de agatai unu partner nou chi siat in is cundizionis de tenni unu pranu industriali adatu e capaci de garentiri unu nùmeru de órdinis prus mannu, poita tenendi scéti un'órdini de Telecom no si podit garentiri sa seguresa de s'atividadi".
In su trastempus is 480 traballantis de Video on line 2.0 sighint s'ocupazioni de su call center de bia Montecassino, in Pirri, arribada a oi a sa bintiguàtresima diri.