Vertenza Video on line 2.0. "Su presidenti de sa Regioni Cappellacci interessit sa Telecom in is tratativas"

(IlMinuto) – Casteddu, 4 de su mes''e làmpadas - S'acuntessia Video on line 2.0 arribbat in s'iscriania de Ugo Cappellacci. Su grupu "Comunisti-Sinistra sarda-Rossomori" at difatis scritu una lítera a su Guvernadori pedendi debressi s'interventu de sa Regioni in sa vertenza e s'obertura de is tratativas cun Telecom Italia: s'azienda chi commissionat su traballu a su call center casteddaiu.
"Est assolutamenti urgenti - scrirint is consilleris - un'interventu cun Telecom Italia poita siat valutada in deretura sa necessidadi de cunfirmai e forsis allargai is serbízius giai donaus cun cumpeténzia e impegnu a s'azienda telefonica".
S'acuntessia Video on line est una circustànzia crítica séria. Is casi 500 traballantis no arricint su stipendiu de mesis e in is diris passadas est arribbada sa lítera de isfratu de is aposentus de bia Montevecchio.
"S'asuria - precisat sa lítera - de calincuna propriedadi e calincinu grupu manageriali determinant una poberesa senz''e torrada de s'Italia e de s'Ísula nostra.
Totu custu depit essi frimau. Po custu, puru a custa vertenza de traballu depit essi assegurada solidariedadi ativa e depit essi assegurau s'interventu autorevoli de s'Istituzioni Autonomista".
Is consilleris ant signalau a s'atenzioni de Cappellacci puru s'acuntessia Jobintel.