Traballu: Sielte ndi liat su cantieri senz''e ai nau nudda primu. Sindacaus: "azioni de pagu coru"

(IlMinuto) - Casteddu, 29 de su mes''e làmpadas - Ariseru a mangianu 18 traballantis de sa Sielte ant cumenzau sa diri cun d'un'arregalu pagu bellu. Su cantieri chi s'agatàt in sa statali 554 (acanta a sa Motorizazioni civili), aundi iant traballau finzas a su mangianu de cenàbara, furiat stetiu sbarazau.
In su fin''e cida, senz''e nai nudda, s'aziendha iat difatis libberau s'area de traballu de totus is ferramentas nezessàrias po s'atividadi de is operàjus. Puru is machinas aziendhalis furiant sparessias". Denunziant su fatu is segreterias provinzialis de Fiom, Fsm e Uilm e is rapresentanzias sindacalis aziendhalis.
Is sindacus cundennant  "s'azioni fatta cun pagu coru de s'aziendha, tratendi is raportus cun is sindacaus e is traballantis in d'unu modu disdignosu e contra a dógnia régula cundividia. Ddoi furiat in cursu una tratativa. S'aziendha, chi si ocupat de is rezas fissas e no de is telecomunicazionis, iat annuziau sa serradura e su lissenziamentu de su personali. "Is órdinis ddoi funt, no ddoi esti stetiu nesciunu calu de traballu - acrarant Fiom, Fsm e Uilm - nonostanti custu, de diversu tempus sa Sielte at manifestau s'intenzioni de serrai su cantieri chi donat traballu a 18 ànimas, po custus 'e totu pedit s'obertura de una procedura de mobilidadi".
Àterus 14 traballantis funti giai in cassintegrazioni. "S'obbietivu beru de s'aziendha - si ligit in sa nota sindacali - est cussu de afidai is órdinis in subapaltu, aprofitendi de is prézius prus bàscius de is aziendhas prus piticas de su cumpartu".