Cumpostu (Sni): "At bintu s'alleànzia de cussus chi no funt andaus a votai"

(IlMinuto) – Casteddu, 15 de su mes''e làmpadas - "Is elezionis provinzialis dda s'at bintas s'alleànzia de cussus chi no funt andaus a votai". Est cantu afirmat cun d'una nota su cordinadori nazionali de Sardigna Natzione Bustianu Cumpostu, cummentendi is arrisurtaus de su segundu turnu de is elezionis amministrativas.
"Eus apicau - precisat Cumpostu - 2000 manifestus chi lamànt a is sadrus a abarrai a foras de sa gara eletorali e a s'uniri contra a su nucleari".
"Forsis sa cosa est passada - precisat su leader indipendentista - e calincunu s'est arreconnotu in custa cosa e at cundividiu cun nos su fattu chi ddoi funt chistionis cuncretas, chi tenint prus importànzia de su nùmeru de is 'onorevoleddos' de eligi in is provizieddas".
In custas elezionis Sardigna Natzione esti stetia s'únicu partidu a fai campagna po no andai a votai. Senz''e cundizionis.
"Sni - acrarat Cumpostu - at donau a is eletoris sadrus s'indicu de no andai a votai po motivus acapiaus a su pensu de is àterus indipendentistas de andai a is elezioni po contu insoru, unu pensu de divisioni no cundividiu, e puru po arrealia a s'ingannu de is provizieddas chi sa casta política italianista at imbentau po sistemai is próprius talent-scout ponenddidus a càrrigu de is comunidadis".