Vertenza Sogaerdyn. Cgil: "De sa sociedadi de gestioni si bint scéti cumportamentu pagu bellus"

(IlMinuto) – Casteddu, 28 de su mes''e maju - "Su cumportamentu de sa sociedadi de gestioni de s'aeroportu de Casteddu, chi at sceberau de no tutelai is 48 traballantis de prus dex'annus impignaus in is operazionis de càrrigu e scàrrigu de is mercis, est unu cumportamentu chi no si podit acetai". Ddu narat su segretariu de sa "Camera del lavoro" de Casteddu, Nicola Marongiu, chi custu mangianu at a participai a s'atóbiu chi s'at a tenni a faci de is 10.00 in is ufícius de sa Presidénzia de sa Regioni in viale Trento cun su capu de gabinetu Giandomenico Sabiu.
Sa Cgil at a propòniri de istrobeddai sa vertenza cun d'"un'acórdiu de passàgiu de sa durada de cincu mesis chi torrit a cunfirmai su cuntratu a su cunsórziu de is coperativas po oberri, a pustis de s'istadi, una gara de apaltu chi dongat seguresa a is 48 traballantis e chi acrarit po sèmpiri sa chistioni".