Sa Giunta aumentat de tres a cincu is personas chi ant a fai parti de su cda de s'Arst. Bianco (Cgil): "Un'insultu po totus is traballantis"

(IlMinuto) – Casteddu, 21 de su mes''e maju - "Unu sceberu assurdu e aggraviosu, un'insultu po totus is traballantis e is famílias chi funt sunfrendi sa crisi e funt is únicas a ndi pagai is cusseguénzias". Cun custus fueddus su segretariu de sa Filt Cgil, Sandro Bianco, denunciat sa delíbbera 19/12 de su 12 de su mes'e maju de sa Giunta regionali chi, po mori de una proposta de s'assessori regionali de is "Trasporti", at aumentau de tres a cincu su nùmeru de is consilleris de amministrazioni de s'Arst.
"Si tenint coràgiu e faci - sighit Bianco - chistionint pubblicamenti e acrarint is arrexonis de s'acrescimentu de custas cadiras pagadas beni meda". Sa delíbbera istabbilit difatis de "fissai sa paga de is consilleris de amministrazioni istabbilendi de donai a su Presidenti de su consillu de amministrazioni una paga uguali a sa paga totali chi tocat a unu Diretori generali de s'Amministrazioni regionali cun bint'annus de anzianidadi. A is àterus in veci tocat una paga ugualis a su cincuanta po centu de s'indennidadi chi tocat a su Presidenti...".