Palomba (Idv) arrespundit a s'assessori regionali Carta: "A fac''e falsidadis craras abarrat scéti sa cuerela"

(IlMinuto) – Casteddu, 11 de su mes''e maju - At a arribbai in Tribbunali su scontru a corpus de notas de imprenta tra s'ex presidenti de sa Regioni,  Federico Palomba, e s'assessori regionali de is "Lavori pubblici", Angelo Carta. S'esponenti de s'Idv dennegat difatis is afirmaduras fattas connosci ariseru de s'esponenti de sa Giunta regionali ("A sa fini de s'iter cumenzau de sa Giunta de Federico Palomba, su 27 de su mes''e austu de su 1999 - at afirmau ariseru Carta in d'unu comunicau - unu determinu de s'assessorau a s'"Industria" autorizàt s'impiegu de su materiali de arrefudu de sa miniera de Futtèi po su cumprimentu de is istradas") e annunziat sa cuerela.
"Su 27 de su mes''e austu de su 1999 - precisat Palomba - diri de su determinu chi teniat comenti tema s'usu de is materialis, mi furiu giai gosendi s'assébiu a pustis de ai finiu su mandau chi m'iat donau s'incàrrigu de Presidenti, incàrrigu finiu de prus de unu mesi, endi deu giai de tempus donau is cunsignas a su Presidenti Pili, cosa fatta puru de s'assessori Mario Pinna cun s'assessori chi iat pigau su postu suu, persona chi s'agatat acanta de s'area política de s'atuali assessori Carta".
"S'iter - sighit s'ex presidenti de sa Regioni - at atravessau totucantus is giuntas de centrudestra de su 1999 a su 2004. Deu no c'intrau de su principiu, sèmpiri ca sa destra no cumprovit de m'ai biu addenoti, a pustis de ai lassau sa Presidénzia de sa Regioni, portai sachiteddus de terra in is logus de is traballus. Su presidenti Soru e su ministru Di Pietro no c'intrànt, endi scéti assistiu a su batiari de un'òpera fatta totucantu de is giuntas de destra".
"A fac''e falsidadis craras - concluit s'esponenti de s'"Italia dei Valori" - abarrat scéti una cosa de fai: sa cuerela".