Nucleari. Apellu de Sni: "In atóngiu totus a is urnas po firmai s'istrada de s'àtomu

(IlMinuto) – Casteddu, 24 de su mes''e maju - Sardigna Natzione annovat sa mobilitazioni contra a su nucleari abetendi su referendum de cust'atóngiu. In is diris chi benint s'organizazioni indipendentista de Bustianu Cumpostu at a usai is logus de sa propaganda eletorali implícita po apoddai - si ligit in d'una nota - "un'apellu a totus is sadrus, a foras de is sceberus eletoralis chi ant a fai su 30-31 de su mes''e maju, po arraspundi unius a sa mobilitazioni contra a su perígulu nucleari e po si preparai a votai 'SI' totus impari in su referendum po su nucleari e chi tenit comenti domanda 'Sei contrario all’installazione in Sardegna di centrali nucleari e di siti per lo stoccaggio di scorie radioattive (...)?'".
Su símbolu de Sardigna Natzione no at essi presenti a is amministrativas de su 30 e de su 31 de su mes''e maju. Po is provinzialis sa scuadra política indipendentista narat a totus "de no premiai is progetus eletoralis chi bollit a sighiri a portai ainnantis sa parzimenta política indipendentista". Nesciunu votu po s'Irs de Gavino Sale e nemmancu, comenti est craru, po is partidus italianus".
Diversa est sa chistioni po is elezionis comunalis. "Sni si ligit in d'una nota - est presenti in diversas listas civicas e espressat, cun Giampiero Marras, su candidau a síndhigu de Ittiri in sa lista 'Sinistra Identitaria'".
In is cidas passadas Sni iat puru garentiu s'acozu a sa lista de aMpI (Bruno Bellomonte candidau a síndhigu) in is elezionis comunalis de Tàtari.