Eolicu: Espa (Pd): "No est responsàbbili poniri in su própriu pranu Tiscali e is impresas de sa penísula chi funt arrischendi de tenni cuntatus cun sa mafia"

(IlMinuto) - Casteddu, 14 de su mes''e maju - "Su modu pagu cuscenziosu cun su cali su Centrudestra est chistionendi de is circustànzias de sa Tiscali-eolicu faint benni su fritu". Est cantu scrirint cun d'una nota is consilleris regionalis de su Pd Marco Espa, Pietro Cocco e Gianvalerio Sanna. "Trumentat su modu usau de sa majoria de guvernu - acrarant is democraticus - po chistionai de sa dimanda fatta de sa Tiscali a su Cacip po s'assignamentu de un'ispàziu tra cussus giai destinaus a prodúsiri energia de fontis alternativas. Una dimanda fatta po podi poniri cuatru palas eolicas chi ant a serbiri a prodúsiri una parti de s'energia necessària a s'azienda. E no àteru.
"Imbecis de afortiai sa dimanda de claresa e de dibbatidu púbblicu fatta de su centrusinistra in Consillu Regionali, agatendusì in acódriu cun s'apinnicu po is possíbbilis cuntantus cun sa mafia atressu sa produzioni de currenti de s'eolicu - finint Espa, Cocco e Sanna - su centrudestra fai benni su fritu po sa mancànzia de responsabbilidadi sua ponendi in su própriu pranu un'azienda sadra cun is aziendas de sa penísula chi, a cantu si podit ligi in is giornalis, iant a bolli torrai a usai dinai brutu atressu s'eolicu".