72 intelletualis de su Pd a Bersani: No a is paraogus in matéria de àtomu". Palomba: "Perígulu. Cadena umana in difesa de su territoriu"

(IlMinuto) – Casteddu, 13 de su mes''e maju - In su Pd nascit su"grupu" in favori de su nucleari, unu grupu de intelletualis - cun nòminis de unu certu pesu comenti cussus de Umberto Veronesi e Tiziano Treu - chi ant difatis mandau a su segretariu nazionali de su partidu, Pierluigi Bersani, un'apellu in favori de s'impiegu de s'àtomu po prodùsiri energia e contra a "sa scassesa cun sa cali, su prus de is bias, de parti de is esponentis de su Pd funt afrontaus temas chi iant a meritai una discussioni prus aprofundada, fatta cun nùmerus de fatu".
Su documentu esti stetiu firmau puru de s'astrofisica Margherita Hack (in is ùltimas elezionis europeas primu candidada in Sardigna po su Prc e su Pdci). Sa lígia de s'apellu at scadenau luegu sa reazioni de su parlamentari Federico Palomba, candidau po s'Idv a sa presidénzia de sa Provìnzia de Casteddu.
"Est unu perígulu légiu", scririt Palomba. "Cust'atu meda grai - precisat s'esponenti de s'Idv - de fatu oferit una manu a is disignus de su Guvernu po torrai a ponni is centralis nuclearis. Sa Sardigna, comenti si scit, currit s'arriscu meda mannu de essi tra is regionis aundi su Guvernu bollit ponni custus impiantus meda bécius, chi impestant e chi faint dannus a sa saludi de sa genti e de su territoriu. S'àrgini contra a su nucleari - concluit - est sèmpiri prus míseru. Eus a abarrai nos de s'"Italia dei Valori" a s'arrebbellai, atressu su referendum nostru e, si fessat necessàriu, aprontendi una cadena umana in difesa de su territoriu".