Prc dinúnziat po sa malacreménzia contra a giòvanus emigraus in su mercau de Cuartu. "Tocat a dd'acabbai cun su razismu istituzionali"

(IlMinuto) – Casteddu, 23 de su arbili - "Tocat a dd'acabbai cun is azionis de razismu istituzionali. Custas malacreménzias funt fillas de is cusseguénzias de su clima de ódiu raziali e de cassa a su furisteri bófiu de is destras a su guvernu. Unu clima scadenau de sa cultura de is pachitus de siguresa e de is leis Bossi-Fini e Turco-Napolitano. Unu clima aggraviosu chi corpit is amministrazionis de su territoriu, e cun custas puru sa citadi de Cuartu".
Cun custus fueddus su segretariu federali de su Prc, Giuseppe Stocchino, sa cordinadora de is "Giovani Comunisti" de sa provìnzia de Casteddu, Marta Laura Farci, cundennant sa "carda donada a unu giòvanu furisteri", fattu custu acontéssiu mérculis passau in Cuartu Sant'Alèni in su mercau de via San Benedetto e fattu connosci atressu unu videu carrigau in Youtube.
"Is immàginis - acrarant Farci e Stocchino - ammostant unu giòvanu furisteri impauréssiu (ca su videu indicat comenti senegalesu), incordonau de una dexina de agentis de sa pulizia municipali cuartesa chi circant de dd'ammanetai cun d'una forza e una malesa sempiri prus manna. Mancumali ca funt numerosus is zérrius de sprama de is citadinus chi ant biu sa cadra e dinunziant su cumportamentu scurrégiu de is agentis".