Pd: primarias de alleànzia su 18 de su mes''e arbili. Uras (Sel): "Is forzas prus piticas podint fai propostas po candidadura bincidoras. Ddu cumprovat sa Puglia"

(IlMinuto) – Casteddu, 9 de su mes''e arbili - "Arrespetaus su documentu firmau de is forzas políticas de centrusinistra su primu de su mes''e marzu passau: s'alleànzia at sceberau de usai is primarias si no ddoi est síntesi chi ponit totus de acórdiu". Est cantu at afirmau su segretariu regionali de su Pd, Silvio Lai, a s'acabbu de sa direzioni de su Partidu chi at donau su cunsensu a is primarias de alleànzia po domìnigu 18 de su mes''e arbili, nonostanti s'arrialia de su Prc, de su Pdci, de s'Upc, de su Psi e de s'Idv (partidu chi no bollit acozai sa candidadura de Graziano Milia a sa presidénzia de sa Provìnzia de Casteddu nemmancu si a binci in is primarias fessat própriu s'ex síndigu de Cuartu Sant'Alèni).
"Su fueddu - at nau Lai - andat torrau a is citadinus aundi no ddu est unidadi de màssima si sceberit atressu is primarias e atressu de su votu popolari".
In faori de is primarias puru Sinistra Ecologia e Libertà. "Eus giai nau - precisat su consilleri de Sel Luciano Uras - ca is primarias no funt sa pesta de sa política. No ddas bollit chini tenit ispàsamu de su pensu popolari o chini no tentit propostas de fai o de acozai. S'acuntéssia de sa Puglia cumprovat a su contràriu ca puru is forzas políticas prus piticas podint, si ndi tenint, fai propostas e candidaduras bincidoras".