Mobilitazioni contra a chini alluit su razismu po dividiri is traballantis". Su Pcl cundennat s'aciocu de S'Alighera

(IlMinuto) – Casteddu, 19 de su mes''e arbili - "Sa strossa soziali, economica e culturali creada de su capitalismu in sa própriu fasi prus bàscia, agiudat sa spaniadura tra sa genti de un'ideologia de tipu razista, promòvia de sa destra "populista" e medievali rapresentada de sa Lega e de su Pdl".
Cun custus fueddus Umberto Bitti de su Pcl cummentat s'aciocu razista de cida passada in S'Alighera. "Un'aciocu malu deléntinu de tipu razista a is dannus de duus fradis congolesus", ammentat Bitti. "Unu coxineri de 28 annus e un'istudianti de 22, tot''e duus citadinus italianus". S'aciocu, fattu de una mesu duzina de piciocus, esti stetiu acumpangiau de insultus razistas, comenti 'brutus nieddus torraisindi de aundi seis arribbaus', e de canzoneddas malas fillas de calincunu movimentu políticu de destra. Sa surra est cuminzada cun d'un'apedriada, cun puntadas de peis e cun buciconis. finzas a candu calincunu testimóngiu no at donau s'allarmi e is ses si funt istresiaus".
Su Pcl incrupat puru a sa sinistra. "Responsabbilidadi grai - narat Bitti - tenit puru una sinistra ammajetera (Rifondazione) chi in custus ùltimus annus no at pensau a àteru si no a cuntratai cun su Pd e cun su capitalista Soru".
Su Pcl de sa Sardigna - concluit Bitti - espressat totu sa solidariedadi sua a is duus piciocus scutus e a totus is brassàglius de su razismu, scuadrista o istituzionali chi siat, e proponit a totus is forzas antirazistas de si mobilitai contra a custus fattus e contra a cussas forzas políticas chi impitant s'ideologia razista po aghilliri cunsensu e po dividiri is traballantis".