Cassa de intregrazioni po is 343 traballantis de s' Eurallumina

(IlMinuto) – Casteddu, 1 de su mes''e arbili - Is 343 traballantis de s'Eurallumina ant a arriciri s'assignu de cassa de integrazioni gadagnu "in deroga" assumancu finzas a su 31 de su mes''e paschixèdda de su 2010. Est cantu stabbilit un'acórdiu firmau ariseru in Casteddu de is rapresentantis de sa Regioni, de s'Inps, de sa Direzioni regionali de su "Lavoro", de s'azienda e de is organizazionis sindacalis.
S'acórdiu previdit un'ispesa totali de 5.371.843 eurus: su 70 po centu a gàrrigu de su Stadu e cussu chi abarrat a càrrigu de is cassas regionalis. Is operàjus de s'Eurallumina no afestant: in is mesis passaus ant circau in totus is modus de stranziri s'allonghiamentu de sa cassa 'e integrazioni, ma is manifestazionis in Casteddu e in Roma no ant cumbintu is capus mannus de sa multinazionali russa Rusal, meri de s'istabilimentu surcitanu, a torrai a cumenzai sa produzioni in Sardigna.