"Sa Pompia". Su candíu de Thiniscòle a sa cunchista de is mercaus mundiallis

(IlMinuto) – Casteddu, 22 de su mes''e marzu - "Pompia": est custu su nòmini de un'agrùmini meda mannu, légiu e deformi, de orígini disconnotas, coltivau de séculus in su satu de Thiniscòle. De su frutu connotu comenti "Citrus Mostruosa" - chi arribbat a pesai puru 700 grammus - si faint, grazias a is rezetas passadas de boxi in boxi, s'omónimu druci, unu candíu meda mannu, e unu licori digestivu. Su candiu, arregalu de coia meda disigiau, podit essi allogau po annus aciufau in su mebi "millefiori" de su logu. Custu est unu prodotu unicu, de promovi e de fai connosci in Sardigna e in su mundu. Cun cust'obbietivu sàbudu passau, in s'Àula Magna de s'Istitutu Ténnicu Cumerciali "Luigi Oggianu" de Thiniscòle, s'est tentu unu cunvegnu aprontau de sa Pro loco de sa bidda. Atóbiu chi at biu sa participazioni de s'assessori de s'"Agricoltura" de Nùgoro, Franca Carroni, e Marco Caredda de s'Item de Nùgoro. "Is massajus de custu frutu - acrarat una nota - si lamentant po s'ausenzia de agiudu de parti de sa Regioni e de Parti de s'Italia", ma, grazias a s'impignu de un'imprendidora de su logu, Francesca Pau, su prodotu cuminzat a essi presenti in is Fieras internazionalis. Tra no meda tempus Pau at a portai "Sa Pompia" in San Pietroburgu e in sa Fiera Internazionali de Bucarest, in su mes''e totussantus.