No a sa centrali nucleari in Sardigna. Manifestazioni in Cirras po sbarrai s'istrada "a is pranus de su Guvernu"

(IlMinuto) – Casteddu, 25 de su mes''e marzu - Su movimentu antinucleari sadru sighit a "pedalai". Po domínigu 28 de su mes''e marzu est difatis in programma in Cirras - tra Santa Justa e Arborèa - una manifestazioni po nai no a su nucleari e a is ferrinas. Su scioberu de su logu no est po nudda casuali. "Naraus a totus is citadinus - scrint is aprontadoris - de s'atobiai in su terrenu aundi, si is 'pranus de su Guvernu ant a andai comenti programmau' at essi fabbricada sa centrali nucleari".
Pranus chi parrint cunfirmaus de is dichiarazionis fattas de pagu de su deputau Pdl Giorgio Stracquadanio, chi collegat sa sighida de s'atividadi de s'azienda Alcoa a su fàbbricu de una centrali nucleari in s'Isola.
No scéti. "Tra sa Sardigna e su Laziu - svelant is aprontadoris de sa protesta in d'una ischeda - s'est finendi unu collegamentu asuta de mari, su Sapei, po su trasportu de energia eletrica a una poténzia de milla megawatt. Unu fattu strambecu custu! Sa spiegazioni prus lógica est ca su cavu chi est asuta de mari siat stetiu progetau po trasportai bia sa penísula s'energia eletrica chi benit fatta in Sardigna cun d'una centrali nucleari".
Medas de is manifestantis ant a arribbai in Cirras in bicicreta, e s'ant a agatai in Casteddu (8.30, istazioni Fs) e in Aristanis (10.oo, istazioni Fs)