Multaus cun 22 millionis su cartellu de su gas. Irs: "S'Eni si salvat, ma at sfrutau su stadu de bisóngiu de is sadrus"

(IlMinuto) - Casteddu, 25 de su mes''e marzu - Corpu forti po su cartellu de su gas. S'Antitrus at difatis multau cun 22 millionis de eurus sa Liquigas (17,1 millionis de eurus) e sa Butangas, responsàbbilis, tra su 1995 e su 2005, de ai fattu un'acódriu po is prézius de su gas cun dannus mannus po sa genti chi ddu pagàt e po sa cuncurrénzia. 
Is sadrus funti stetius is primus màrtiris de su cartellu de su gas, cun d'unu costu de sa bòmbola prus artu de 15-20 eurus si cunfrontau cun is prézius nazionalis.
De su trust fadiat parti puru s'Eni, chi esti stetiu salvau de is multas po ai denunciau s'acórdiu a s'Autoridadi.
"S'Eni si salvat - iscririt s'Irs in d'una nota - ma est una cosa assurda ca própriu in Sardigna, aundi est partida s'inchiesta chi chistionat de s'esisténzia de unu cartellu chi bollit arribbai a un'acórdiu po su préziu de su Gpl, no si siat pensau de fai calincuna cosa cun prus forza e precisioni contra a chini at sfrutau unu stadu de abbisóngiu (in Sardigna no ddoi funt isceras a custu tipu de energia), cun d'un'efetu meda grai po s'economia de is famílias".