In Casteddu is giòvanus de sa música classica po sa X edizioni de sa "Accademia Internazionale"

(IlMinuto) – Casteddu, 30 de su mes''e marzu - Masao Kawasaki e sa própriu viola, su flautista Andrea Griminelli, is sonadoris de pianu forti Huseyin Sermet e Eugene Moguilevsky: funt custus is facis noas chi ant fai mirífica sa X edizioni de s'"Accademia Internazionale di Musica di Cagliari", in programma de su 29 de su mes''e austu a su 9 de su mes''e cabudanni. Maistus importantis po cust'eventu nàsciu in 2001 e chi, annu po annu, s'est afirmendi sempiri de prus in s'iscena internazionali de s'istudiu musicali. Una fortuna cunfirmada puru de is 130 iscritus de s'edizioni passada. Musicistas chi benint de 12 logus diversus, est a nai de su Giaponi, comenti sempiri (cun 62 iscritus), de sa Francia e de sa Corea del Sud.
"Giòvanus meda bravus - acrarat una nota de imprenta - chi in Casteddu scint de agatai cundizionis meda bellas po mellorai sa própriu connoscénzia: una citadi acatosa, is àulas de su Conservatoriu 'Giovanni Pierluigi da Palestrina' funt atrazadas meda beni, e in càtedra musicistas de fama internazionali in arribbu de iscolas musicalis e de is conservatorius prus bonus, prus de totus s'Ecole Normale Superieure de Musique 'Alfred Cortot' de Parigi (chi puru ocannu oferit tres borsas de istudiu po frecuentai is próprius cursus de s'annu chi benit)".