Sbarazzu de Giorginu. Sa denúnzia: "No s'ant permitiu de torrai a intrai in s'edifíziu. Eus perdiu medas bagàglius e dinai". Su presidiu a facc''e su Comunu

(IlMinuto) – Casteddu, 18 de su mes''e fiàrgiu - "S'iant assegurau ca ddoi furiant is domus noas illuegus de su sbarazzu, ma no furiat beru. No s'ant nemmancu donau su permissu de torrai a intrai in s'edifíziu e eus perdiu medas bagàglius e meda dinai". Est custa sa dinúnzia de unu giòvanu traballanti de su Senegal chi custu mangianu at participau a su presidiu de protesta a facc''e sa sedi de su Comunu de Casteddu in prazza De Gasperi. A s'iniziativa ddoi furiant circa  50 personas, immigraus e personas de sa "Rete Antirazzista" chi s'est arrebbellada a su sbarazzu de Giorginu e at dinunziau is continus azóchius de is forzas de s'órdini in is domus pigadas in afitu de is senegalesus. A una cida e pagu prus de s'operazioni esti stetiu agatau unu logu - po cantu pagu seguru po su benidori o atesu de su logu de su traballu - po sa grandu parti de is ex residentis de s'Edem. Duus traballantis senegalesus funt in veci ancora aghillius in s'hotel Quattro Mori. Immoi po is immigraus is pensamentus mannus funt duus: pigai una residénzia (elementu nezzessariu po podi abarrai innoi) e agatai unu logu po is 40 traballantis residentis in s'ex Edem chi immoi funt in Senegal e chi torrendi in Sardigna s'ant a agatai senz''e domu. Su sbarazzu de Giorginu - si podit liggiri in d'una nota fatta connosci de is aprontadoris - esti stetiu un'operazioni de pulizia. Un'abbusu chi no at rispetau nemmancu is términus detaus de s'ordianzia 'e totu (...). Ddoi furiant tropus testimóngius po no biri ca ddoi furiant cuatru scuadras de sa pulizia pagu beni intenzionadas". "Is istituzionis responsàbbilis - concluit sa nota - tenint su doveri de agatai diaderus una soluzioni prus bella po totus cussus chi in is ex domus Edem iant agatau abbitu.

 (Si ringraziat Alessandro Cuccu po is fotografias)