Nucleari: "Rifondazione Mejlogu" at a sustenni su referendum de Sni. Su círculu de su Prc promovit sa campagna po s'àcua pubblica e contra a sa precariedadi

(IlMinuto) – Casteddu, 11 de su mes''e fiàrgiu - "Si depeus impegnai di modu ca is 17milla firmas pigadas diventint unu coru cuncordiosu contra a sa costruzioni in Sardigna de is centralis nuclearis e de is depósitus de ferrinas radioattivas". Cun custus fueddus su círculu de Rifondazione comunista de su Mejlogu assegurat su própriu apógiu a su referendum contra a su nucleari promòviu de Sardigna Natzione Indipendentzia. "A su própriu tempus - si podit liggiri in d'una nota - seus impegnaus in sa próssima campagna nazionali de sa "Federazione della Sinistra" (campagna bófia de su Prc) po promòviri su referendum contra a sa costruzioni de is centralis nuclearis in totu sa penísula, ma puru contra a sa precariedadi de su mundu de su traballu e po fai torrai s'acua unu beni pubblicu (...)". "Po custu - concluit su Prc de su Mejlogu - no scéti naraus de votai 'SI' a su próssimu referendum regionali, ma sigheus in sa batalla narendi a totus is traballantis, is istudiantis e is cittadinus (...) de fai comitaus promotoris 'contra a su nucleari, po s'àcua pubblica e contra a sa precariedadi' in totu su territoriu sadru, abetendi s'arregorta de is firmas chi at a cumenzai in totu s'Italia in su mes''e arbili chi benit".