Isciòpiru generali: Su Sindacadu de sa Natzione Sarda no at a participai a su corteu. "Manifestai cun Cappellacci est unu frastimmu"

(IlMinuto) – Casteddu, 4 de su mes''e fiàrgiu - S'isciòpiru de su 5 de su mes''e fiàrgiu isperrat su mundu indipendentista. Si aMpi e Sni ant a participai a su corteu cun d'unu cordoni indipendentista, s'Irs no at a pigai parti a su corteu de Casteddu. Aici at a fai puru Su Sindacadu de sa Natzione Sarda. "Su Sindacadu - si podit liggiri in d'una nota - annunziat ca no at a portai is próprias banderas a sa manifestazioni de Casteddu de su 5 de su mes''e fiàrgiu de su 2010, aprontada de is dirigentis de is sindacaus confederalis "italianus" poita penzat chi siat assurdu ca a su costau de is traballantis in lota cabint in prazza puru is istituzionis, associazionis de meris, sindacaus e partidus chi tenit curpas mannas in custa crisi". Su sindacau indipendentista cunsiderat puru "meda negativu manifestai cun su sennori Cappellacci chi bollit mudai sa 'protesta' de su 5 de su mes''e fiàrgiu in 'súplica' a sa benaulénzia de su sennori Berlusconi.