Vertenza Alcoa: s'azienda annunziat sa fin''e sa produzioni. Tres operàjus incadenaus a is arrastellus de sa centrali Enel

(IlMinuto) – Casteddu, 27 de su mes''e gennargiu - Diri niedda po s'Alcoa de Portovesmi: in su vertice de ariseru in su Ministeru de su "Sviluppo economico" sa multinazionali at difatis annunziau ses mesis de stop de is impiantus abetendi ca s'Unioni Europea dongat cumenzu a is prézius fattus de su Guvernu. Po sa Regioni e is sindacaus s'Alcoa est scéti faendi un'ateru passu po s'incarrerai sa serradura de is istabilimentus de Portovesmi e Fusina. "A custu puntu - at commentau su presidenti de sa Regioni Ugo Cappellacci - no seus prus dispostus a participai a is atóbius e no seus prus dispostus a discútiri de clausolas noas. Po nosu abarrant duus puntus frimmus: s'istabilimentu no depit serrai e sa produzioni no si depit firmai. Si s'Alcoa depit abbandonai totu si ddu depit nai allestru e si depit ponni in is cundizionis de circai un'atera soluzioni". In sa diri de ariseru, a pustis de ai scipiu s'ésitu negativu de s'atóbiu romanu, tres operàjus de s'Alcoa si funt incadenaus a is arrastellus de sa centrali Enel in s'area industriali de Portovesmi. Is traballantis ant puru blocau is intradas de s'istabilimentu Alcoa po impediri s'essida de is mercis.