Sinistra Critica narat no a su sbarazu de is senegalesus de s'ex Edem. "Tocat a dd'acabbai cun sa cassa a s'irregolaridadi"

(IlMinuto) – Casteddu, 21 de su mes''e gennargiu - "Tocat  add'acabbai cun is assaltus a s'obbréscida in is domus afitadas a is immigraus, tocat a dd'acabbai cun sa cassa a su 'clandestinu'. Stop a s'ammalezu de sbarazu de s'ex Eden de Giorginu, aundi de sa fin''e de is annus Noranta bivint centu immigraus senegalesus". Cun custus fueddus su cordinamentu provinziali de Sinistra Critica de Casteddu espressat solidariedadi "a is immigraus chi resistint a s'intemperiada de razzismu e particolarmenti a sa comunidadi senegalesa chi bivit in sa provìnzia". "Su sindigu de Casteddu Emilio Floris - si podit liggiri in d'unu comunicau stampa de su movimentu po sa sinistra anticapitalista - cavalcat s'unda razzista de Rosarnu e annunziat su sbarazu de s'ex Edem. Contemporaneamenti is 'forzas de s'ordini' mortipricant is assaltus a s'obbréscida in is domus, a cassa de chini no est in régula, e pagu tempus fait unus cantu immigraus senegalesus funti stetius bogaus de una domu afitada, in Stampaxi. Sinistra Critica arremaciat su própriu no a dognia forma de razzismu e at a donai su própriu agiudu a sa lota po firmai custu mali nàsciu de sa pagu cuscénzia".