Isciòpiru generali: totu sa Sardigna in prazza su 5 de su mes''e fiàrgiu: no mollant is operàjus de s'Alcoa e de sa Vinyls

(IlMinuto) – Casteddu, 12 de su mes''e gennargiu - Su 5 de su mes''e fiàrgiu totu sa Sardigna s'at a firmai. Is sindacaus cunfederalis Cgil, Cisl e Uil ant annunziau custu mangianu sa data de s'isciòpiru generali: una mobilitazioni po nai no a sa crisi e a su sciàsciu de s'industria sadra. In su trastempus sighit s'ocupazioni de sa Turri aragonesa de Pòrtu Turre de parti de is operàjus Vinyls e is traballantis Alcoa no mollant sa lota nonostanti sa cassa integrazioni e sa possibbilidadi de s'incriamentu de s'istabilimentu. Cenàbara is operàjus de Portovesmi ant essi in Roma cun is sindacalistas, is amministradoris de su territoriu, is parlamentaris sadrus e su presidenti de sa Regioni, Ugo Cappellacci, po pediri a su Guvernu de torrai a oberri sa chistioni cun sa multinazionali de s'allumíniu. Sa mobilitazioni romana at essi precedia de un'atera manifestazioni, cras in Casteddu.
"S'incriamentu de is istabilimentus de Portovesmi e Fusina - scrint po su Prc Roberta Fantozzi de sa segreteria nazionali e Vittorio Macrì de sa segrateria regionali - iat a aggravai una chistioni giai meda grai. Prusatotu po sa Sardigna custu iat a bolli nai sa perdida totali de casi dognia aparatu industriali. Sa multinazionali americana at tentu in is ùltimus annus guàdangius mannus de is proprias filialis italianas ma (...) esti stetiu avreguau ca s'Alcoa no tenit interessu a lassai innoni sa produzioni (...). Su Guvernu si depit fai càrrigu de custa chistioni decidendi de s'impignai inderetura po fai abarrai sa produzioni de s'allumíniu in Italia".