Presoni de Igrèsias: Caligaris (Sdr), "situazioni meda perigulosa" po unu presoneri esauriu e drogau

(IlMinuto) - Casteddu, 10 de su mes''e paschixèdda - "Unu presoneri de su presoni de Igrèsias, chi est meda esauriu, est passendi unu momentu de difficultadi meda mannu e perigulosu po sa saludi de cuss''e totu. Su presoneri refudat de chistionai cun sa familia e cun s'abbogau. No fait is telefonadas de sa cida. Is condizionis si funt aggravadas de candu funti stetius respintus is arrestus domiciliaris in d'una comunidadi de cura". Ddu narat cun d'una nota Maria Grazia Caligaris, presidenti de s'associazioni "Socialismo Diritti Riforme". Cussa denunziada de s'esponenti socialista est sa situazioni de Fabrizio Loddo, 37 annus, casteddaiu, presoneri de su mes''e fiàrgiu 2007 po sa culpa de "assoziazione a delinquere finalizzata al traffico di sostanze stupefacenti", primu in Buoncamminu e, de su mes''e maggiu passau in su presoni de Igrèsias. "Sa familia - at nau Caligaris - est meda impensamentada poita Fabrizio Loddo esti una persona meda fràgili, chi si fait mali a solu, chi at tentau duas bortas, in pagu tempus, de si bocciri, e po fortuna esti stetiu salvau. Loddo tenit duus fillus minoris chi no bidit de casi un'annu e su trasferimentu a Igrèsias, aundi no ddoi est nemancu un centru po ddu curai, at portau prus apretus a sa mulleri chi dd'iat a bolli chistionai de prus". "Su stadu de esaurimentu  - at nau ancora s'esponenti socialista - esti stetiu dinunziau in s'istanzia po oteniri is domiciliaris in d'una comunidadi de cura chi su difensori de su presoneri Herica Dessì at presentau a is Giugis giai de su 2008 e in Appellu su mesi passau. Sa dimanda perou esti stetia respinta e su presoneri at cumenzau a s'aggravai". "No si cumprendit poita - at nau Caligaris - a unu presoneri cundennau a 8 annus e 2 mesis (3 giai scontàus) siat stetia negada sa possibbilidadi de risolviri sa dipendènzia de sa droga, chi est causa de sa culpa chi est iscontendi. Totu custu puru si su presoneri at manifestau, impari a sa familia, sa voluntadi de fai su programma de curas in d'una comunidadi chi est pronta a dd'aghilliri e a sustenni is nezzessidadis
cautelaris".