Partit de New York sa valorizzazioni de is esportazionis de su Pecorinu Romanu Dop in America

(IlMinuto) – Casteddu, 3 de su mes''e paschixèdda - "Seus in s'Isola de su pastori: una regioni in su centru de su Mediterraneu aundi de is pascimentus de erba bella arribbant is benefízius po sa saludi de s'ómini". Cun custus fueddus, Toto Meloni, presidenti de su "Consorzio di tutela del Pecorino Romano Dop" e de su "Consorzio Latte" de Macumère (Nùgoro), at inaugurau una promozioni meda manna in America de su casu a pasta dura fattu po su 98 po centu in Sardigna. In sa conferènzia stampa chi s'est tenta ariseru in s'auditorium de su The Times Center, aintru de su New York Times Tower americanu, Meloni at presentau is cosas chi funt faendi is duus consórzius po promoviri s'export de su pecorinu romanu, chi in su 2008 at biu abasciai de su 25 po centu is bendidas de su casu de trattai prus famosu in su mercau americanu. Esportazioni sempiri prus bascia: in su 2008 s'America nd'at comporau circa 151milla cuintalis mentris in su 2007 ndi furiant stetius importaus 178milla, in línia cun sa media sighia in su decenniu. Po promoviri cussu chi est cunsiderau su rei de s'export agrualimentari sadru, su "Consorzio Latte" - cun s'agiudu de su " Consorzio di Tutela" - at investiu prus de unu milioni de eurus in d'una grussa azioni de marketing po totu su 2010: funti stetius scioberaus una dexina de format televisivus de s'area "food" po sa programmazioni de serbizius e programmas chi chistionant de su Romanu. In programma puru sa partizipazioni de is prinzipalis giornalis cun s'organizzazioni de conferènzias stampa aundi fai conòsciri in modu scientificu is risultaus de is istudius prus rezentis chi chistionant de is propriedadis medas bonas chi custu casu tenit po sa saludi.