Nucleari: Pes (Pd) Scajola depit mantenni is impegnus elettoralis cun s'Isola

(IlMinuto) - Casteddu, 11 de mes''e paschixèdda - In s'ùrtima campagna elettorali po rinnovai su Consillu regionali de sa Sardigna su capu de su Guvernu, Silvio Berlusconi, e su ministru de su "Sviluppo economico", Claudio Scajola, "iant assigurau ca su Guvernu no teniat s'intenzioni de costruiri centralis nuclearis in Sardigna": ant cambiau idea o bollint arremaciai is impegnus pigaus cun su populu sadru? Est cantu dimandat cun d'una interrogazioni a su ministru de su "Sviluppo economico" sa parlamentari de su "Partito Democratico" Caterina Pes. Segundu cantu dinunziau de su leader de is "Verdi" Angelo Bonelli s'8 de su mesi de paschixèdda - iscririt Pes - "s'Enel at mandau unu dossier a su Guvernu in su cali funt indicaus is logus aundi s'iant a depi fai is centralis nuclearis in Italia (...)". Segundu cantu narat Bonelli - sighit s'interrogazioni - "is logus aundi s'ant a depi fai is centralis nuclearis funt Montalto di Castro (Vt), Borgo Sabotino (Lt), Carigliano (Caserta), Trino Vercellese (Vercelli), Caorso (Piacenza), Palma (Agrigentu), Monfalcone (Gorizia) e Aristanis". S'Enel at smincìu s'èsistenzia de sa lista, perou su 4 de su mes''e paschixèdda - dinunziat sa parlamentari - s'amministratori delegau de s'Enel 'e totu, Fulvio Conti, "iat declarau in d'un'intervista a sa televisioni ca s'azienda iat giai individuau is logus de interessu po sa cosa".