Cras isciòpiru de is ditas de apàltu de Saras e Polimeri: "Basta cun is garas a ribbassu. Bolleus prus seguresa"

(IlMinuto) - Casteddu, 8 de mes''e paschixèdda - Nai no a is apàltus a ribbassu chi "arriscant de poniri in perigulu is dirittus de is traballantis, particolarmenti po sa seguresa". Cun cust'iscopu - a pustis de ses mesis de sa morti de Melis, Muntoni e Solinas - su Coordinamentu de is operàjus e de is ditas de apàltu de sa zona industrali de Sarròccu ant proclamau po cras tres oras de isciòpiru (de is 7 a is 10). Ddoi at essi finzas unu sit in de is traballantis acanta de su biviu tra sa Saras e sa Polimeri. De su coordinamentu faint parti chímicus, metalmeccanicus, aterus traballantis e sindacalistas de Cgil, Cisl e Uil. "Bollint - si podit liggiri in d'una nota - donai is apàltus a is aziendas estèrnas, in sa provìnzia e in totu sa regioni. Si custa cosa diventat una pràtica chi si fait sempiri - narant Cgil, Cisl e Uil - no dd'ant essi prus sa calidadi de su traballu, is zertèsas po sa continuidadi de s'ocupazioni e po sa difesa de is dirittus ottentus". Tra is motivus de sa protesta ddoi funt puru is mancànzias de sa formazioni po sa seguresa. Unu sistema, denunziant is sindacalistas, "prus teoricu ca praticu, chi no lamat in causa totus is traballantis e no fazilitat sa zertificazioni de is dipendèntis".