Vertenza Alcoa: Cig po 568 operajus, cras manifestazioni in Roma

(IlMinuto) - Casteddu, 25 de su mes''e totussantus - Totus in Roma. No si firmat sa protesta de is traballantis de s'Alcoa de Portovesmi. Cras prus de 500 dipendentis sadrus de sa multinazionali de s'allumíniu ant essi in Roma, forsis a Palazzu Chigi, po manifestai contra a sa serradura de is istabilimentus italianus, confirmada de sa decisioni de s'azienda de cumenzai is procedimentus de cassa integrazioni po 568 dipendentis. Sa manifestazioni s'at a tenni contemporaneamenti a s'atóbiu chi ddoi at essi in su "Ministero dello Sviluppo economico" po chistionai cun s'azienda de sa vertenza. Sa mobilitazioni at essi accumpangiada de is consillus comunalis obertus, chi s'ant a tenni in is logus de sa protesta. "Sa situazioni de sa vertenza Alcoa est precipitada - si podi liggiri in d'una nota diffùndia de is segreterias nazionalis de Fim, Fiom e Uil - cun sa decisioni de s'azienda de firmai sa produzioni de s'allumíniu primariu". Is sindacaus "respingint calisisiat firmada de sa produzioni de s'allumíniu in is duus istabilimentus de Portovesmi e de Fusina, puru si si narat chi custas firmadas ant essi "temporaneas". Totu custu própriu poita, po is caratteristicas tecnicas de custus impiantus, chi si firmant no podint essi prus operosus".